nihatya taṃ saṃyati kārtavīryaṃ saputtrapauttrāmitasainyavīram।
rāmo rameśāṃśakalākalāpo nirvijyacāpo girimadhyuvāsa॥ 10-1 ॥
girau vasan valkalavastravāsī rāśībhavan brāhmaṇasadguṇānām।
kāśīśapādāmbujacittavṛttirāśīrivāsīddvijadevatānām॥ 10-2 ॥
avyāhatā śambhuvaraprasādādgatirgatijñasya mahāmahimnaḥ।
brahmāṇḍakoṭiṣvapi no vijaghne bhūteṣvivotsaṅgabhuvo dvijendoḥ॥ 10-3 ॥
anekaśaḥ śuddhasuviprabālān sa śikṣayannāsta samastaśāstram।
adhyāpanaṃ vedamukhaṃ dvijānāṃ nirhaitukaṃ dharmamudāharanti॥ 10-4 ॥
niḥsvārthavipraḥ subaṭuṃ kulīnaṃ pradhyāpayeccecchrutimūlaśāstram।
vaikuṇṭhaloke sa mahīyamāno brahmāpnuyācchāstradhano hi vidvān॥ 10-5 ॥
ye chāttrataḥ kiñcidihāharanti viprā na te brāhmaṇalāñchanāni।
puttrīyati cchāttramamoghavidye vipre śrutirvarṣati vatsalāmbhaḥ॥ 10-6 ॥
abhedabuddhiḥ sutaśiṣyayoryaḥ ṣaṭkarmasantyājitaṣaḍvikāraḥ।
trikālasandhyo vihitāgnihotraḥ sa brāhmaṇo deva ihāsti sākṣāt॥ 10-7 ॥
evaṃ bhṛgūṇāṃ pravaro’navadyo mukhaprabhāvrīḍitapārvaṇenduḥ।
samācaran brāhmaṇavarṇadharmān jigāya lokāntapasā samastān॥ 10-8 ॥
sa brahmacaryavratināṃ variṣṭho jitendriyo brāhmaṇadharmaniṣṭhaḥ।
gataspṛhastyaktasamastabhogo rogānaśeṣān vinināya caityān॥ 10-9 ॥
dine bhramaṃstāpasavṛndagehān lokān punānaḥ padapaṅkajābhyām।
rātrau girāvāsta sa kaśyapājñāṃ sammanyamāno jananīmivādyaḥ॥ 10-10 ॥
kadācidāsthāya viviktadeśaṃ matiṃ samādhāya mahānubhāvaḥ।
vicārayan vignamanā manasvī svapūrvakṛtyaṃ na sa sādhu mene॥ 10-11 ॥
aho mayākāryamakāri nūnaṃ krodhaurvasaṃśuṣkaśamārṇavena।
yadbrahmaṇaḥ śāśvatasārabhūtāṃ kṣamāṃ jahāmi sma maṇiṃ phaṇīva॥ 10-12 ॥
kṣamā dhanaṃ brāhmaṇapuṅgavānāṃ tāmatyajaṃ krodhavaśaṃvado’ham।
so’yaṃ nirastākhilasārasattvo bhastreva jīvāmi mṛto jagatyām॥ 10-13 ॥
tātaṃ hataṃ jīvayituṃ kṣamo’pi yatkṣattriyāṇāṃ kadanaṃ hyakārṣam।
tannānurūpaṃ vimalānvayasya dhiṅmāṃ nṛśaṃsaṃ kṛtajīvahiṃsam॥ 10-14 ॥
sarpo’pi bāleṣu dayāṃ karoti krūraṃ prakṛtyā paramaṃ yamāhuḥ।
garbhārbhakāṇāṃ pravidhāya hatyāmahaṃ tataḥ krūrataro’smi jātaḥ॥ 10-15 ॥
trisaptakṛtvo jagatīmanindyāṃ vidhāya vīryādvidhavāmivāham।
tadaśrudhārākaluṣīkṛtātmā vācyo na kiṃ syāṃ bhuvaneṣu mandaḥ॥ 10-16 ॥
pitā’pi saptarṣigaṇaṃ praviṣṭo dīrghāyurāpto viśadapratiṣṭhaḥ।
paraṃ yaśaścandragataṃ kalaṅkaṃ nirdoṣahatyākhyamahaṃ bibharmi॥ 10-17 ॥
yadvā na caite patayo dharaṇyā bhārāyamāṇāḥ kṛtakilbiṣāśca।
tāneva hatvā niśitaiḥ kṣurapraiḥ laghūkṛto bhūmibharo mayā’yam॥ 10-18 ॥
tathāpi tatkhedavinodanārthaṃ viniścito me paramaḥ prayatnaḥ।
bhūtvā parabrahma manuṣyaliṅgaṃ rāmākhyametattanayāpatiḥ syāt॥ 10-19 ॥
bhūmeśca jāmātṛvarāya bhūmne śastracchalenārpitakāryabhāraḥ।
taṃ kṣāmayan pūrvakṛtāparādhān vātsalyapātraṃ bhavitā kṣamāyāḥ॥ 10-20 ॥
yadyapyayaṃ saṃyati kārtavīryo nīto mayā vīragatiṃ tathāpi।
bhāro hi bhūmeradhunāpi jāgratsa rāvaṇo rāvayati trilokīm॥ 10-21 ॥
na rāvaṇo vyaktiviśeṣa eṣa pratīkabhūtaḥ khalasaṃskṛteśca।
tannāśane nāhamalaṃ laghutvāddhvāntaṃ na coḍuḥ kṣamate nihantum॥ 10-22 ॥
rāmaḥ svarūpaṃ hi manuṣyatāyā rāṣṭrasya vai maṅgalanāmadheyam।
sa eva hatvā daśakaṇṭhamājau lokān samastān sukhino vidadhyāt॥ 10-23 ॥
he rāma he rāghava rāvaṇāre he jānakīnetracakoracandra।
he dīnabandho karuṇaikasindho trāyasva lokaṃ nanu rākṣasendrāt॥ 10-24 ॥
iti vyavasyātmani bhārgavendraḥ praṇamya rāmaṃ prabhaviṣṇumīśam।
tepe tapastāpitaṣaḍvikārastapaḥpradhānaṃ kila vipramāhuḥ॥ 10-25 ॥
tasmin hate saṃyati kārtavīrye kuṭhārahastena ca bhārgaveṇa।
laṅkeśvaro’pāstasamastaśaṅko niraṅkuśo mattakarīva jātaḥ॥ 10-26 ॥
krīḍāmṛgo yena kṛto’ṅganānāṃ vandīkṛto bhagnabalāvalepaḥ।
tasminmṛte rākṣasarājarājo niṣkaṇṭakaṃ lokamimaṃ sa mene॥ 10-27 ॥
hate pratidvandvini haihayeśe sa rāvaṇo ghorataro babhūva।
rāhūparāgāpagame papīrvā pāpī prabhāvoddhatabhūribāhuḥ॥ 10-28 ॥
pulastyavaṃśāmalacandramo’ṅkaḥ paulastyaputtrāmbudhinīcapaṅkaḥ।
virañcisṛṣṭīndukalākalaṅko lokān samastān sma rujatyaśaṅkaḥ॥ 10-29 ॥
mandodarīkamrakalatrakāntaḥ svavīryasaṅkṣobhitadigdigantaḥ।
utkhātadikkuñjaradivyadanto daśānano’bhūdbalavān durantaḥ॥ 10-30 ॥
virañcito labdhavaro’tidhṛṣṭaḥ svamaulimālārcitacandracūḍaḥ।
pravṛddhapaṅktidvayabāhudaṇḍasindhuṣvamartyān jalayāmbabhūva॥ 10-31 ॥
sakumbhakarṇānujavīryaviśvaviśvāsakṛcchakrasapatnaputtraḥ।
reje viṣāṇadvayadattadarpo daśānano dānakarīva mattaḥ॥ 10-32 ॥
jahāra yakṣāmaranāgakanyā luluṇṭha ratnāni divaukasāṃ saḥ।
virāvayan rāvaṇa ārtalokān tṛṇāya matvā vibudhān babādhe॥ 10-33 ॥
rājadbhavānībhavabhūtabhavyaṃ kailāsamuttolya kutūhalena।
svakandukīkṛtya kalaṃ karāgraiḥ khelan sakhelaṃ bhramayāmbabhūva॥ 10-34 ॥
evaṃ vijityāmararājalokaṃ sa bādhamāno’khilajīvalokam।
daśānanāvagraha ugravīryaḥ saṃśoṣayāmāsa marutsuśasyam॥ 10-35 ॥
nirmathya devān sa vijitya rājño nihatya vīrān daśatīvradhandhvā।
laṅkeśvaro roṣaṇavikramo’yaṃ sudharmaśīlān vyathayāmbabhūva॥ 10-36 ॥
nainaṃ prakāmaṃ savitā tatāpa tadaṅganāmaṇḍanatāntibhīruḥ।
rātrau niśeśo’pi niśācareśaṃ sudhāmayūkhaiḥ śiśiraiḥ siṣeve॥ 10-37 ॥
aśokapattrāvalipātabhītyā mandaṃ vavau vāyuratīva tasya।
nijātapatraprahitaḥ pracetāstaṃ vārayāmāsa sadātapebhyaḥ॥ 10-38 ॥
na yajñayāgā na ca dharmacaryā na vā purāṇāni na vedapāṭhaḥ।
adharmamūlāṃ jagatīṃ vidhāya dharmasya cakre nirapekṣavādam॥ 10-39 ॥
tasmin pradhāvatyabhidevalokaṃ vīryoddhate rāvaṇa ugravege।
bhūmirjale mattagajendrarūḍhā prakampitā nauriva vātamūḍhā॥ 10-40 ॥
jātā yadā dharmamayasya hāniḥ suduḥsahā kāraṇapūruṣasya।
tadaiva gorūpadharā dharitrī śṛṅgaṃ sumero rudatī jagāma॥ 10-41 ॥
brahmā tayā sākamathendumauliṃ nivedya tenāpi sahājagāma।
sāketalokaṃ virajaṃ viśokaṃ karīva taptaśca sudhātaḍāgam॥ 10-42 ॥
sa ratnasiṃhāsanamādidevaṃ devādhidevaṃ śritasarvasevam।
dadarśa nīlābjaghanāvadātaṃ sītāpatiṃ sevakapārijātam॥ 10-43 ॥
dūrvādalāmbhojatamālakandakalindajātīsimayūrakaṇṭhaiḥ।
dattopamāṃ koṭimanojaśobhāṃ prabibhrataṃ śyāmalamūrtimīḍyām॥ 10-44 ॥
munīndrasanmānasarājahaṃsanīḍāyitaṃ rāmapadāravindam।
mandākinī yanmakarandabhūtā pūtā samastaṃ bhuvanaṃ punāti॥ 10-45 ॥
vasantabālārkakarābhirāmaṃ kadambakiñjalkalasallalāmam।
sukiṅkiṇīmaṇḍitacārukaṭyā pītaṃ vasānaṃ paṭamaprameyam॥ 10-46 ॥
kalindajāvartasamānanābhiṃ svalpodaraṃ taṃ trivalīmanojñam।
nigūḍhajatruṃ hatasarvaśatruṃ nisargadṛksvastyayanaṃ surāṇām॥ 10-47 ॥
sītāsamāliṅganalabdharomaśrīvatsalakṣmāṅkitaviprapādam।
vakṣo lasatkaustubhasaktakaṇṭhaṃ keyūramālādivibhūṣaṇāḍhyam॥ 10-48 ॥
ājānubāhuṃ ripucandrarāhuṃ śubhe niṣaṅge’suradarpabhaṅge।
dadhānamibhyārisamaprabhāvaskandhaṃ yathā vīrarasaṃ dhṛtāṅgam॥ 10-49 ॥
suvarṇapuṅkhāśugamaṇḍitābhamadhijyacāpaṃ svakare dadhānam।
surendracāpāśritasaubhagaśrīprāvṛṭpayovāhamivāttadeham॥ 10-50 ॥
kaṭhorarākendusamābhirāmaṃ samullasatkuṇḍalasatkapolam।
navīnarājīvadṛgānanaṃ yanmandasmitaṃ tasya janaspṛhārham॥ 10-51 ॥
lasallalāṭe rucirordhvapuṇḍraṃ śrīmadhyagaṃ sādaramādadhānam।
nīlādrimuccaiḥ kalitatriveṇīṃ sambhāvayantaṃ nanu tīrtharājam॥ 10-52 ॥
kirīṭamadhyādatha tasya keśāścakāsire vakratayābhirāmāḥ।
manye sudhālobhata eva bhṛṅgā abhīndumete caṭulā babhūvuḥ॥ 10-53 ॥
virājamānāmatha vāmabhāge sītāṃ lasaccampakacāruśobhām।
nīlāmbudaṃ bhūṣayituṃ ca śampāṃ sthitāmivāśritya sutārakālīm॥ 10-54 ॥
nirīkṣya taṃ yogidurāpamūrtiṃ sītābhirāmaṃ naradevaliṅgam।
brahmā caturbhirvadanaiśca bhaktyā pracakrame stotumanalpavṛttaiḥ॥ 10-55 ॥
jaya jaya jānakīnayananīrajameṣarave
caritasudhābdhimagnamunisiddhasurendrakave।
jahi jahi rāvaṇaṃ samiti pādanamattridaśaṃ
hara hara bhūtalasya bharamīśa nirastarasam॥ 10-56 ॥
jaya jaya jānakīvadanacandracakora vibho
jaya jaya jāhnavījanakapādapayoja prabho।
tava caraṇāravindaśaraṇānmaraṇābhimukhā-
nava bhavabhāvavaśya vibudhān hṛtasarvasukhān॥ 10-57 ॥
jaya jaya jānakīhṛdayaharṣapayodhividho
tridivamanāthamātmaśaraṇaṃ hṛdi viddhi vidho।
sadaya vidhatsva dhatsva karuṇāṃ nṛpamaulimaṇe
damaya daśānanaṃ damitadūṣaṇa ghoraraṇe॥ 10-58 ॥
jaya jaya jānakīśa karuṇāvaruṇālaya he
trijagadidaṃ vinaṣṭavibhavaṃ paripālaya he।
vitatamanāthanātha virudaṃ vinibhālaya he
dharaṇimupehi dīnajanatāmanulālaya he॥ 10-59 ॥
jaya jaya jānakīramaṇa mādhava mādhipate
nijajanaśokasindhughaṭaja vratamañjumate।
surakulaśālimambubhiralaṃ sujanaikagate
bhuvamabhivarṣa tarṣamabhito hara hārarate॥ 10-60 ॥
jaya jaya jānakīsarasijānanabhṛṅgamanaḥ
kuru karuṇāṃ sureṣu bhavatāttava teṣu manaḥ।
alamadhameṣu rāma dayayā damayasva khalaṃ
niśitaśarairnihatya niśicāriṇamāttabalam॥ 10-61 ॥
jaya jaya jānakīharivadhūvaravīra hare
tvayi vayamāśritā suravare raṇadhīravare।
jahi jahi jihmamenamiva jambhamamartyapatiḥ
punarudiyātsureṣu tava pādasarojaratiḥ॥ 10-62 ॥
jaya jaya jānakīmadhuramānasamandira he
bhava bhavabhīmavārinidhimaṅgalamandara he।
praṇatapadābjadevanikare karuṇā kriyatāṃ
śitaśaratīrthametya daśamaulirayaṃ mriyatām॥ 10-63 ॥
aguṇamalepamekarasamadvayamekamajaṃ
tadiha viduḥ sarūpaguṇadhāmamupāstaguṇam।
bhidamubhayorvadanti yadihāśrutisāravido
narakamamī patanti parameśvarabhedadṛśaḥ॥ 10-64 ॥
jalahimatulyamekamubhayaṃ saguṇaṃ hyaguṇaṃ
yadaguṇamekamanādi tatsaguṇamapyamalam।
prakaṭaguṇaṃ saguṇaṃ vadanti bhavakantamamī
aguṇamatastirohitaguṇaṃ kathayanti budhāḥ॥ 10-65 ॥
yadi saguṇo bhavān sakalasadguṇavān na bhave-
dvayamiva tanmahābhavasamudranimagnanarāḥ।
kathamu tareyurīyuratha pāramapāranidheḥ
kimu khalu ko’pi kūpamapi rajjumupekṣya taret॥ 10-66 ॥
yadaguṇamastasarvaguṇakaṃ pralapantyabudhā-
stadiha na jānate vimalavedanigūḍhagiraḥ।
yadaguṇakaṃ tadeva saguṇaṃ dvayamekamaho
drutaghanayorjalasya vapuṣoḥ kimu tattvabhidā॥ 10-67 ॥
prakaṭayase yadā svajanabhāvarirakṣiṣayā
guṇanikarāṃstadaiva saguṇaṃ samuyanti janāḥ।
bhavasi yadā nilīnaguṇakastvamahetutayā
vibudhagaṇāstadāhuraguṇaṃ bhavakantamime॥ 10-68 ॥
tvamasi samākṛtimāṃstvameva ca nirākṛtika-
stvamaguṇakastvameva saguṇaḥ śrutisāramimam।
iti munayo vibhāvya bhagavaṃstava pādayuga-
plavamadhiruhya teruratha ghoranidhiṃ muditāḥ॥ 10-69 ॥
nahi khalu māyikā bhavati deva samastaguṇā
bhuvanabhavāya bhānti bhavatīva nabhasyuḍavaḥ।
guṇaguṇino svarūpamanubandhamayuḥ śrutayaḥ
prajahati no bhavantamiva vāri rasaḥ suguṇāḥ॥ 10-70 ॥
tvayi saguṇatvameva bhagavaṃstvayi cāguṇatā
dvayamapi maṅgalāya bhavataḥ padakañjajuṣām।
saguṇatanau tathāpi ramate mama rāma manaḥ
kimu madhupo vihāya vanajaṃ madhuke’bhiramat॥ 10-71 ॥
akalamayurdurūhamaguṇaṃ sulabhaṃ saguṇaṃ
tadiha vayaṃ bhajāma saguṇaṃ bhavabhītimayāḥ।
bhavasi yadā nirastapariheyaguṇo’pyaguṇaḥ
punaratha bhāsi divyasuguṇairbhagavan saguṇaḥ॥ 10-72 ॥
tava vihitāvatāramapi rūpamakhaṇḍamajaṃ
vikṛtimupaiti naiva bhagavan kvacidapyanagham।
nahi virajañca nīramapi nīrajasaṅkulitaṃ
kamalamalaṃ jalaṃ prakurute’malamālikulam॥ 10-73 ॥
avataraṇañca ye yadaraṇaṃ bhavabhītimatāṃ
yadi na bhavedbhavāya bhagavanmaghavānaghavān।
kathamiva pālayejjagadasau khalabhagnabalo
vayamapi kiṃ bhavema sukhino hṛtagehadhanāḥ॥ 10-74 ॥
anavataran bhavānahaha vettu kimārtajanān
kathamatha tārayetpatitalokamaśokamanāḥ।
caritamahāmṛtāmaranadīmavagāhya kathaṃ
vayamatha rāmabhadra bhavato’bhibhavema rujam॥ 10-75 ॥
nahi tava janma karma paripākavaśaṃ bhagavaṃ-
stvamatha na lipyase viyadivākhilakarmaphalaiḥ।
iti sudhiyo dhiyā dhṛtabhavatkaruṇaikabalā-
stṛṇamiva karmabandhamapi bhaṅktumibhāḥ prabhavaḥ॥ 10-76 ॥
nahi tava nāmarūpaguṇajanmacaritrakathāḥ
kathayitumīṣṭa eṣa jana īṣṭanisargatayā।
yadi śatakoṭiśeṣaśivanāradavedagiro
gaditumalaṃ rajāṃsi dharaṇernanu ko gaṇayet॥ 10-77 ॥
bhavadavatāracārucaritaṃ śrutisomamayaṃ
sakṛdapi ye pibanti mahadindumukhādgalitam।
tṛṇamiva te jahatyahaha mokṣamuta tridivaṃ
kvacidapi kiṃ cakora iha nimbarase rucimān॥ 10-78 ॥
tadalamaho vilambya karuṇāghanasomaghaṭā
ghaṭayatu vṛṣṭisṛṣṭimabhibhārataśasyakulam।
damaya daśāsyanāmaduravagrahakaṃ bhagavan
śamaya śucātapaṃ tapanavaṃśakṛtaprabhavaḥ॥ 10-79 ॥
tava karuṇā na cedbhavati devagaṇe bhagavan
kathamatha mucyatāṃ suracayo daśakaṇṭhavaśāt।
śaraṇamupetya kiṃ vibudhavṛkṣamanāptaphalo
mriyata ilābhayāptavibhavaiḥ paribhūtamanāḥ॥ 10-80 ॥
bhavadavatāraheturadhimartyamanāryavadha
iti ya ihāmananti kila te’jñaśiromaṇayaḥ।
bhṛkuṭivilāsamātravihitāṇḍakaṭāhalayaḥ
kimu maśakaṃ jighāṃsuravanāvatha so’vataret॥ 10-81 ॥
nijajanakañjabhāvamakarandapipāsuralaṃ
madhupavaro’vatīrya tanuṣe virudaṃ viśadam।
tava caritānimeṣasariti pranimajjya janāḥ
sukhamupayanti bhagnabhavabhānuśucaḥ śucayaḥ॥ 10-82 ॥
avasi janān janārdana jagadviṣayānalataḥ
patitakulañca tārayasi ghorabhavāmbunidheḥ।
imamavatārasāramavadhārya vayaṃ vibudhā-
stava padapadmametya nibhṛtā vigatābhibhavāḥ॥ 10-83 ॥
raghuvara rāmabhadra bhavabhāvana bhāvanidhe
tvamasi pitā tvameva jananī tvamathāsi sakhā।
sadaya dayasva datsva vibhayaṃ padapadmajuṣāṃ
tvamasi kṛpānidhāna śaraṇaṃ bhavabhītimatām॥ 10-84 ॥
jaladharanīlaśīlasuṣamāsamatāsadanaṃ
śaradamalenduvārijavibhāvilasadvadanam।
aśaraṇasiddhayogimuninākasadāṃ śaraṇaṃ
caraṇasarojametya vinatāḥ samajāharaṇam॥ 10-85 ॥
avatara bhārate’pahara bhūtalabhūribharaṃ
vighaṭaya kuñjarāririva vairigajendraghaṭām।
daśamukhamaulimañjutaramastakamālikayā
giriśamapīha pūjayatu te raṇatāṇḍavakam॥ 10-86 ॥
iti nigadya giro gira īśvaro rucirarociṣamambudasundaram।
praṇinanāma nanāma marudgaṇo gaṇitarāvaṇabāṇatanuvraṇaḥ॥ 10-87 ॥
tamagadadgaditākṣaragadgadaṃ gatasukhaṃ sukhamuktacaturmukham।
vidhimalokitarāvaṇabhīvidhiṃ budhamivātha vidhurvihasan vidhuḥ॥ 10-88 ॥
daśanadīdhitibhirvidiśo diśo vitimirā vidadhatkaruṇālayaḥ।
smitamiṣeṇa samāṃstridaśānasau vimṛḍayan sudhayeva jagatpatiḥ॥ 10-89 ॥
alamaho vibudhāḥ paridevanairbhavata labdhasukhā mayi tiṣṭhati।
pitari jīvati satyapi sūnavo bhayayutā yadi dhikpitaraṃ tadā॥ 10-90 ॥
bhavata vijvarakā jvarakātarāstarata bhīṣaṇaśokamahāmbudhim।
sapadi paśyata pāṃśuviguṇṭhitaṃ daśamukhaṃ mukhabhinnaśilīmukham॥ 10-91 ॥
ahamajo’pi nirastamalo’pi san prakṛtimāsthita eva guṇāśrayaḥ।
aguṇako’pi mudā saguṇo bhavannavatareyamaho hyadhikosalam॥ 10-92 ॥
bharatalakṣmaṇaśatruniṣūdanaistribhiratho svaśubhāṃśakaviṣṇubhiḥ।
samavatīrya ca bhāratamedinīṃ dhavalayeyamalaṃ guṇaraśmibhiḥ॥ 10-93 ॥
daśarathasya gṛhe gatavigrahe narapateśca lasadguṇasaṅgrahe।
samavatīrya tadīyasuto bhavannihatarāvaṇako bhavitāsmi bhoḥ॥ 10-94 ॥
sapadi māmanuśaktimayī mama priyatameva vidhuṃ kila rohiṇī।
avatariṣyati bhūjananī bhuvi janakṛte’śithilā mithilāpure॥ 10-95 ॥
vrajata me’nucarā sasukhāḥ surā bhavata vānaradehabhṛto vane।
mama sadāgamanaṃ pratipālyatāṃ makarabhānurivottamavāsaraiḥ॥ 10-96 ॥
parivibhūṣayituṃ ca manuṣyatāṃ sapadi dūṣayituṃ khalasaṃskṛtim।
avatarāmi carāmi ca bhūtalaṃ pravicarāmi carāmi sukhaṃ satām॥ 10-97 ॥
avadhadhāmni sudhāmni dharāśirovaralalāmni sunāmni śiśurbhavan।
sukhayitāsmi tataṃ jananīṃ tathā vimalabhāratavarṣavasundharām॥ 10-98 ॥
iti raghupativāksudhāsanāthāḥ kamabhinatāmṛtajīvitāḥ surāste।
caraṇanalinasaurabhābhitṛptā divasa ivālaya āgatā svadhāmnaḥ॥ 10-99 ॥
śrīrāmaḥ saha sītayā sa bhagavān sammantrya sādhvyā rahaḥ
saṃhartuṃ duravagrahaṃ gurubharaṃ rakṣomayaṃ rāvaṇam।
kartuṃ cāpi viniścikāya jananībhūmīmayodhyāṃ janeḥ
kausalyāṃ saha nīradasya taḍitā bibhradvireje śriyam॥ 10-100 ॥
itthaṃ śubhe bhārgavarāghavīye bhavye mahākāvya udāravṛtte।
sargaḥ praṇīte kavirāmabhadrācāryeṇa bhūyāddaśamaḥ śriyai naḥ॥ 10-101 ॥
iti dharmacakravartimahāmahopādhyāyaśrīcitrakūṭatulasīpīṭhādhīśvarajagadgururāmānandācāryamahākavisvāmirāmabhadrācāryapraṇīte śrībhārgavarāghavīye mahākāvye śrīrāghavāvirbhāvo nāma daśamaḥ sargaḥ।